Safaaradda Jamhuuriyadda Federaalka Soomaaliya ee Boqortooyada Sweden ayaa qado sharaf ku maamuustay Sheekh Maxamed Shaakir, Guddoomiyaha Xisbiga Towfiiq, kadib markii ay si rasmi ah ugu casuuntay xarunta Safaaradda ee magaalada Stockholm.

Kulanka waxaa ka qaybgalay Danjire Abdikarim Ahmed, Danjiraha Jamhuuriyadda Federaalka Soomaaliya u fadhiya Boqortooyada Sweden, oo sidoo kale qaabilsan dalalka Nordic, diblomaasiyiinta iyo howl-wadeennada Safaaradda, iyo qaar ka mid ah xubnaha la socday Guddoomiyaha.
Intii uu kulanku socday, Danjire Abdikarim Ahmed ayaa Guddoomiyaha la wadaagay warbixin guud oo ku saabsan xaaladda jaaliyadda Soomaaliyeed ee ku nool dalalka Nordic, gaar ahaan Sweden, iyo arrimaha khuseeya bulshada Soomaaliyeed ee gobolka.
Kulanka ayaa sidoo kale fursad u noqday is-dhaafsiga aragtiyaha iyo warbixinnada ku saabsan xaaladda jaaliyadda Soomaaliyeed, doorka ay ku leedahay bulshada ay la nooshahay, iyo muhiimadda ay leedahay xoojinta xiriirka iyo wada-shaqaynta bulshada Soomaaliyeed ee ku nool dalalka Nordic.
Safaaraddu waxay uga mahadcelinaysaa Sheekh Maxamed Shaakir aqbalaadda martiqaadka iyo ka soo qaybgalka kulankan.
Stockholm, Sweden







